இலங்கையில் முக்கியமான 5 இடங்களில் யூத வழிபாட்டு தளங்கள் உள்ளன – யாழ்ப்பாணம் மற்றும் கொழும்பை சேர்ந்த இருவரே TID யினரால் கைது செய்யப்பட்டுள்ளனர் ; பொலிஸ் ஊடகப் பேச்சாளர் விளக்கம்

இஸ்ரேலிய சுற்றுலாப் பயணிகள் மீது தாக்குதல் நடத்தப்படலாம் என எச்சரிக்கப்பட்டதைத் தொடர்ந்து எல்ல, வெலிகம மற்றும் கொழும்பு ஆகிய பகுதிகளில் காவல்துறை பாதுகாப்பை பலப்படுத்தியுள்ளது.

வெலிகம உட்பட தென் மாகாணத்தின் பல பகுதிகளிலும், இஸ்ரேலிய சுற்றுலாப் பயணிகள் அதிகம் வரும் எல்ல மற்றும் கொழும்பு பகுதிகளிலும் ஏற்கனவே பாதுகாப்பு நடவடிக்கைகள் அமுலில் இருப்பதாக பொலிஸ் ஊடகப் பேச்சாளர் டிஐஜி நிஹால் தல்துவ தெரிவித்தார்.

எல்ல, வெலிகம, கொழும்பு உள்ளிட்ட ஐந்து பிரதேசங்களில் யூத வழிபாட்டு தளங்கள் அமைக்கப்பட்டுள்ளமை, குறித்த பிரதேசங்களில் பொலிஸாரின் பாதுகாப்பை அதிகரிக்க முக்கிய காரணமாக இருந்ததாக அவர் மேலும் தெரிவித்தார்.

அச்சுறுத்தல்களுடன் தொடர்புபட்ட சந்தேகத்தின் பேரில் சந்தேகத்தின் பேரில் பயங்கரவாத புலனாய்வுப் பிரிவினால் (TID) இரண்டு சந்தேகநபர்கள் கைது செய்யப்பட்டுள்ளதாக பிரதி பொலிஸ் மா அதிபர் தல்துவா உறுதிப்படுத்தினார்.

“ஒரு சந்தேக நபர் யாழ்ப்பாணத்தைச் சேர்ந்தவர், மற்றையவர் கொழும்பைச் சேர்ந்தவர். அவர்கள் தடுத்து வைக்கப்பட்டு விசாரணைக்கு உட்படுத்தப்பட்டுள்ளனர்” என்று அவர் மேலும் கூறினார்.

அருகம்பே பகுதியில் உள்ள பிரபல சுற்றுலா தலங்களை குறிவைத்து தாக்குதல் நடத்தப்படும் என நம்பத்தகுந்த தகவல் கிடைத்துள்ளதாக அமெரிக்க தூதரகம் தனது குடிமக்களுக்கு அளித்துள்ள சமீபத்திய பயண ஆலோசனையில், இலங்கையில் உள்ள இஸ்ரேலிய சுற்றுலா பயணிகளுக்கு எதிரான தாக்குதல்கள் வெளிச்சத்திற்கு வந்துள்ளது.

, ஐக்கிய இராச்சியம், ரஷ்யா, நியூசிலாந்து மற்றும் அவுஸ்திரேலியா போன்ற பல நாடுகளும் இலங்கைக்கான பயண ஆலோசனைகளை வெளியிட்டன.

இந்த விடயம் தொடர்பில் கருத்து தெரிவித்த பதில் பொலிஸ் மா அதிபர் (IGP) பிரியந்த வீரசூரிய, சாத்தியமான அச்சுறுத்தல்களை எதிர்கொள்ள பொலிஸ் விசேட பாதுகாப்பு வேலைத்திட்டத்தை முன்னெடுத்துள்ளதாக உறுதிப்படுத்தினார்.

ஊடகங்களுக்கு கருத்து தெரிவித்த அவர், மத்திய கிழக்கில் இடம்பெற்று வரும் மோதல்கள் மற்றும் அதன் விளைவாக இலங்கையில் இஸ்ரேலியர்களுக்கு ஏற்படக்கூடிய அச்சுறுத்தல்கள் தொடர்பான புலனாய்வு அறிக்கைகளுக்கு பதிலளிக்கும் வகையில் இந்த முடிவு எடுக்கப்பட்டதாக தெரிவித்தார்.