17 ஆண்டுகளின் பின் இலங்கை மண்ணில் நடைபெறவுள்ள SAFF சம்பியன்ஷிப்

தெற்காசியாவின் உதைபந்து உலகக்கிண்ணம் என வர்ணிக்கப்படும் 15ஆவது தெற்காசிய உதைபந்து கூட்டமைப்பு (SAFF) சம்பியன்ஷிப் தொடரை நடத்தும் உரிமையை இலங்கை பெற்றுள்ளது.

இதன் மூலம் 17 ஆண்டுகளுக்குப் பிறகு, பிராந்தியத்தின் சிறந்த உதைபந்து நாடுகளை இந்தியப் பெருங்கடலின் முத்துக்கு வரவேற்கும் வாய்ப்பை இலங்கை மீண்டும் பெற்றுள்ளது.

நேபாளத்தின் காத்மாண்டுவில் இருக்கும் இலங்கை உதைபந்து சம்மேளனத்தின் தலைவர் ஜஸ்வர் உமரின் முறையான கோரிக்கையைத் தொடர்ந்து, தெற்காசிய உதைபந்து கூட்டமைப்பு உறுப்பு நாடுகளால் இந்த முடிவு எடுக்கப்பட்டது.

இந்த அறிவிப்பு இலங்கை கால்பந்துக்கு ஒரு வரலாற்று தருணமாக அமைந்துள்ளது, ஏனெனில் இலங்கை கடந்த 2008ஆம் ஆண்டு கடைசியாக சம்பியன்ஷிப்பை மாலைத்தீவுடன் இணைந்து நடத்தியது. இந்நிலையில் இந்த ஆண்டு ஜூன் மாதம் இலங்கை தனித்து இந்த தொடரை நடாத்தவுள்ளது.

இலங்கை உதைபந்து அணி கடந்த 1995ஆம் ஆண்டு சொந்த மண்ணில் முதல் தெற்காசிய உதைபந்து சம்பியன்ஷிப் தொடரை வென்றது. அன்று முதல் இன்று வரை ஒரேயொரு தொடராக இது மட்டுமே உள்ளது. 2025ஆம் ஆண்டில் போட்டியை நடத்துவது இலங்கைக்கு 30 ஆண்டுகளுக்குப் பிறகு சம்பியன்ஷிப்பை மீட்டெடுக்கவும், உதைபந்தில் தேசிய பெருமையை மீண்டும் உயர்த்தவும் ஒரு பொன்னான வாய்ப்பை வழங்குகிறது.

இந்தப் போட்டியில் ஏழு தெற்காசிய நாடுகள் பங்கேற்கவுள்ளன. இந்தியா (நடப்பு சம்பியன்கள் மற்றும் 9 முறை சம்பியன் பட்டம் வென்றவர்கள்), பாகிஸ்தான், பங்களாதேஷ், பூட்டான், மாலத்தீவுகள், நேபாளம் மற்றும் இலங்கை ஆகிய அணிகள் பங்கேற்கும்.

சொந்த மண்ணில் ரசிகர்களின் ஆதரவைப் பெற்று, இலங்கை தேசிய அணி, போட்டியில் சிறப்பாக செயல்பட்டு, சம்பியன்ஷிப் கிண்ணத்தை மீண்டும் இலங்கை மண்ணுக்குக் கொண்டு வருவதை நோக்கமாகக் கொண்டுள்ளது.